Handelingen van apostels 08
04Dij zo verspraaid worden wazzen, brochten overaal doar ze kwammen bliede bosschop.
05Zodounde kwam Filippus in stad Samaria te laande en verkundegde heur de Christus.
06Ze wazzen t aalgemain mit Filippus zien woorden ains dou ze heurden wat of e zee en dou ze taikens zagen dij of e dee.
07Bie n bult mensken dij onnure gaisten in zok haren, kwammen dij der haard bèlkend oet; lammen en kreupeln werden beter.
08Doardeur kwam der grode bliedschop in dij stad.
09Vrouger aal haar ain of aander Simon in dij stad teuverderij doan en t volk van Samaria haildaal versteld stoan loaten. Hai zee van zokzulm dat e n boaskerel was.
10 Gainain, groot of luddek, was bie hom vandoan te sloagen. Ze zeden: "Dizze man is wat ie nuimen, God zien grode kracht."
11 Dat kwam, deurdat ze al zo laank van zien teuverkunsten versteld stoan haren.
12 Mor dou ze Filippus begunden te leuven, dij t evengelie van God zien keunenkriek en van de noam van Jezus Christus brochde, luiten zai zok deupen, manlu net zo goud as vraauwlu.
13 Simon zulm kwam ook tou geleuf en noa zien deup bleef e aalaan bie Filippus, versteld as e was deur ale taikens en machtege doaden dij e gebeuren zag.
14 Dou apostels in Jeruzalem vernammen dat Samaria God zien woord aannomen haar, stuurden ze Petrus en Johannes noar heur tou.
15 Dij gingen der hèn en beedden veur heur dat ze hillege Gaist kriegen zollen.
16 Dij was nog op gainain van heur deelkommen, ze wazzen bloots deupt in de Heer Jezus zien noam.
17 Dou legden ze heur handen op en zai kregen de hillege Gaist.
18 Dou Simon zag dat Gaist mensken geven wer deurdat apostels heur handen oplegden, bood hai heur geld
19 en zee: "Geef mie dij macht ook, dat elk dij ik handen opleg hillege Gaist krigt."
20 Mor Petrus gaf hom as beschaaid: "Noar de hel, ie mit joen geld! Ie mainen ja dat ie God zien goave mit geld kopen kinnen.
21 Hoog of leeg, der is veur joe gain plak in t beheer van dizze schatten, omreden joen holden tegen God over is nait geef.
22 Breek mit joen slechteghaid. Beed de Heer en vroag vergeven veur wat of ie in t zin haren.
23 Ik zai ja dat ie haildaal vergiftegd binnen en betoesterd zitten in ondeugd."
24 Simon zee: "Beed ie toch de Heer veur mie dat mie niks overkommen mag van wat of ie zegd hebben."
25 Dou zai zo van de Heer getuugd en zien bosschop brocht haren, gingen ze weerom noar Jeruzalem. En in nog hail wat Samaritoanse dörpen verkundegden ze bliede bosschop.
|
